.svg)
Artıq üçüncü ildir ki, “Jazzeri Bands” başlığı altında konsert proqramına gənc ifaçılar cəlb edilir.
Builki konsertə gənc şeypur ifaçısı Firudin Həmidovun “H3” heyəti, Afşin Əlizadənin və Nicat Aslanovun qrupları, müğənnilərdən – Leys İzzi təxəllüsü ilə çıxış edən Leyla İzzətova, Nərmin Kərimbəyova cəlb olunmuşdu.
Son zamanlar gənclərin fəal üslub axtarışları, məşhur xəlqi ya dünyəvi folklor ya estrada irsindən mənimsədikləri mövzulara maraqlı kaver-işləmələr və improvizələr diqqəti cəlb edir. Respublika sarayının səhnəsində “Jazzeri Bands” silsiləsində çıxış edən gənclərin də qəlbəyatımlı ifaları, onların parlaq, perspektivli simaları fonunda daha da ifadəsi artan məşhur mövzular – T.Quliyevin “Pəncərəmə qondu çiçək”, E.Mansurovun “Qatarlar” mahnısı, F.Sinatranın repertuarındakı “Love”, Alişa Kiz’in repertuarından “If I Ain’t Got You”, E.Uaynhauzun “Rehab” kimi hitlər səsləndi. F.Həmidovun “H3” kollektivi R.Babayevin maraqlı təfsir tapan “Düşüncə” əsərini və öz “Xallı”, “Fərqli” adlanan fusion-funk, ethno-hop üslublu kompozisiyalarını ifa etdilər.
Konsertin son, xoş ərməğan qismində təqdim edilən hissəsi – Etibar Əsədlinin çıxışı oldu ki, Bakı publikası sevimli cazmenini bir daha dinləmək imkanını qazandı. Jazz səhnəmizin tanınmış böyük ifaçılarından biri – Cəmil Əmirov və onun “Savab” qrupu konsertə etnocaz ovqatını aşılayan musiqisi ilə müqəddimə oldu.
